Prabu Sri Bathara Kresna narindra ing Negara Dwarawati. Mila ajejuluk Prabu Sri Bathara Kesna narindra panjelmaning Bathara Wisnu, gegadhuhan pusaka Sekar Wijaya Kusuma, senjata cakra. Nyata nata ing Dwarawati Ratu panjalmaning dewa dadi pangayomane para kawula. Uga ngayomi para kadang Pandhawa. Bela marang tumindak luhur tansah nuhoni ing bebener ora kersa nerak paugeraning pernatan tuhu rumeksa saindhenging jagad.
Prabu Sri Bathara Kresna dados pengayome para kadang Pandhawa dumugi perang ing Baratayudha. Minangka dados botohing Pandhawa, pinercaya dening dewa pinaringan Jitapsara. Datan mokal narindra digdaya sekti mandraguna ora tedas tapak paluning pandhe sisaning gurinda yekti titah kekasihing dewa, iku sanyatane atmajanira Prabu Basudewa. Kagungan kadang werda Prabu Baladewa ya Raden Kakrasana narindra ing Mandura. Narindra kang putih warnane nyata wus bontos sawiring ngelmu, tautate jumeneng pandhita gegadhuhan pusaka senjata Nenggala.
Prabu Sri Bathara Kresna uga kagungan kadang mudha ingkang asesilih Dewi Wara Sembadra. Wanita kang endah warnane, saka kersaning jawata wanita minangka baboning ratu. Nalika semana Dewi Wara Sembadra wis dipacangake Raden Permadi atmajane Prabu Pandhudewanata. Ing pangajab bisa ngurunake sejarahing ratu. Idi pangestuning para pepundhen dewa ngudaneni jumenenging ratu Parikesit ana ing negara Ngastina saparipurnaning perang Baratayudha.
0 komentar:
Posting Komentar